مزار داشی اوچون نئچه قوشما
یازار : ساواش
+0 به یه ن
ای وای سنین قصه جانسوزینی هر كس كی ائشیتدی
بیر آه چكیب كوسدی فلكدن سنه خاطیر
ای دؤست سنین شانسینی هر كس كی بیلیردی
چؤخ آرزولارین آتدی نظردن سنه خاطیر
ئؤلمه توپراقلارا وئرمه رم سنی
یئرین قؤل لاریمین آراسیندادیر
طبیعتی سولار ایله یومارام سنی
سویون گؤزومون قاراسیندادیر
هر بیر اولاده شرف، شهرت ایله شاءن آتادیر
باشا تاج، قلبه سئوینج، بخته سلیمان آتادیر
حورمتین ساخلا گیلن دایما عالمده اؤنون
چونكو دونیایه سنی بخش ائدن اینسان آتادیر
غم غصه لر اورگ لری داغلاییب
هجرینده چؤخ گؤزلریمیز آغلاییب
بیز بو یالان دونیایا بیر قؤناغیق
حق توشه سین گؤزل آتام باغلاییب
بهار فصلی خزان گلدی باغیما
سؤلدی آچیلمامیش گوللریم منیم
قارا توپراق چكدی منی كامینا
یاددان چیخاتماسین ائللریم منیم
نئجه راحت یاتاسان بیر گئجه بیز سیز آتاجان
قوروماز گؤز یاشیمیز بیر گئجه سن سیز آتاجان
بیز سنه بولبولودوق سنده بیزه باغ و چمن
نئجه بولبول یاشاسین باغ و چمن سیز آتاجان
سنه گر واضح اؤلا ئؤلماغیم ای بی كس آنا
چاغیرین قؤنشولاری اؤغلونا قور بزم عزا
سیز قورون بزم عزا تا كی منی یاد ائیلیون
اؤخویون سوره الحمد منی شاد ائیلیون
داغلاردان اوجا آنام، دنیزلردن سرین سن
هر نه قدر قؤجالسان، باشقا گؤزل گلین سن
بولبولون سؤلسا گولی بیرده گلنمه ز بو باغا
اُوچونون قاخسا اُوو بیرده دؤلانماز بو باغا
آنانین قوینو هر یئردن راحت اؤلاردی اوشاغا
آنا دور بیر خوشی گلدینی ائله بو قوناغا
بیز لری هجرینده آغلاددین آنا
گون كیمی چیخدین نه تئز باتدین آنا
سن بیزی گؤزدن نیه آتدین آنا
ساخلامیشدیق بیز گؤز اوستونده سنی
آنا، آنا فراقینده آغلارام
آدین گلنده سینمی داغلارام
چیخاتمارام محبتین یادیمنان
لای لای سئون قولاقیمدا ساخلارام
عشقین كی قراریندا وفا اؤلمیاجاقمیش
بیلمم كی طبیعت نیه قؤیموش بو قراری
بؤیوك ننه عجب شیرین دیلیدین
بو گولشنده سن شانلی بیر گولیدین
یاخشیلیقدان من تا نجور ذكر ائدیم
محبت اؤباسیندا سن ائلییدین
ای اوره گی لاله كیمی قان اؤغول
قان ائله دی قلبیمی هجران اؤغول
آنان یوخدور زولفین یؤلا آغلییا
باجی، قارداش بؤیونا قوربان اؤغول
ای اوره گی لاله كیمی قان آنا
قان ائله دی قلبیمی هجران آنا
آنا دئییب هرای چكیب آغلارام
عمروم بؤیی من سنه یاس ساخلارام
نامرد فلك هر گولی كی چؤخ گؤزل اؤلسا
گولزاری خراب ائیلیه جاق بیر گول آپارسین
چرخ و فلكی ساخلاماق اؤلماز یئتیشن وقت
بو عادت اؤلوب غنچه گتیرسین گول آپارسین
بو رسمیدیر كی آی یئرینه گون گئجه گلمه ز
گر جذبه عشق اؤلسا گتیررم نئجه گلمه ز