اومـــای(UMAY)

گؤزلرینین لیلیغینی آخیدیر اورمو
لال لال
لل آخیر
لیل قالیر

گؤزلرینین شورباسینی تؤكور
شور بااا
شورو چیخیر

گؤز ببه‌یینه باسیر جیرناق‌لارینی بول بول بولدوزئرلر
دولانیرلار اؤز باش‌لارینا
بلكه ده اؤز باش‌لارینا یوخ
دولانیرلار دوزدان‌لاری دولدورماغا
دولانیرلار دوز دان یئرینه
اونو دا سؤكمك ایسته‌ییرلر یوخسا

گؤی گؤزلو سئویملی گؤلوم
ساچ‌لارینا كیم دن سالدی؟
كمر می بئلینی كسدی؟
دورنالارین هاردا قالدی؟

دنیز دئییلسن‌سه ده
دن‌لرینین ایزی سیزیلدادیر یارامی

اورمونون گؤیو ده آغاریب آینالیقدان
سدلره دئنن قح.. شوونی گتیریب آغلاماسینلار

(وحید قریشی)